М. Шкетан лÿмеш Марий кугыжаныш драме театр

25 ноябрьыште М. Шкетан лӱмеш Марий кугыжаныш драме театрыште Марий Элын сулло артисткыже Алина Егошинан бенефисше лиеш. Калыклан В.Абукаев-Эмгакын пьесыж почеш шындыме «Алиса, Анфиса, Аниса» комедий ончыкталтеш.  Алисан рольыштыжо – А. Егошина.
Егошина Алина Николаевна 1977 ий 5 июльышто Шернур район Шӱдымарий ялыште шочын. Марисола кыдалаш школ деч вара Москва оласе Малый театр пеленсе М.С. Щепкин лӱмеш Кӱшыл театр училищыш тунемаш пурен. Актёр мастарлыкым Россий искусствын сулло деятельже В.Б. Монаховын вуйлатымыж почеш шуарен.
Театрыште латкум ий чоло пашам ыштыме жапыште А. Егошина кумло наре рольым чоҥен. Нунын коклаште, артисткын ойлымыж почеш, «Улыжат вич кас» спектакльыште Катян, «Роза-Розмарийыште» Розан, «Шешке-шемгишкыште» Юзо шешкын, «Кугезе мурышто» Сасканайын рольышт эн чот шарнымшеш кодыныт.
Пытартыш жапыште артисткылан ятыр спектакльыште тӱҥ рольым ӱшанат.
Марий национальный культурым арален кодымашке да вияҥден колтымашке кугу надырым пыштымыжлан 2008 ийыште Алина Егошина Марий Эл Республикын Кугыжаныш Погынжын Чап грамотыжо, а 2009 ийыште театр искусствым вияҥден колтымашке надырым пыштымылан Марий Эл Республикын правительствыжын Чап грамотыж дене палемдалтын. Культурым калык коклашке шарымашке надыржылан да  пашам кужу жап тыршен ыштымыжлан 2009 йыште А. Егошиналан «Марий Эл Республикын сулло артистше» чап лӱмым пуымо.